[fol. 8, « Rentes non muables »] De Geoffroy Gaucheron, ouvrier en draps de soye, pour la quarte et derreniere porcion de ladite maison (1) contenant de longueur et largeur autant que ladite porcion dessus declairee, joignant d’un long a ladite porcion dudit [Symon] Clemens (2), d’autre long a la maison de Pierre Clarin, a luy baillee a semblable somme de XIIII l. t. d’annuelle et perpetuelle rente payable a ladite ville ausdits termes (3), par moictié, aux charges contenues es lectres de ladite baille a luy faicte le XI^me jour de novembre oudit an mil CCCC quatre vings dix sept (4). Pour ce           XIIII l. t.

[fol. 16v, « Louaiges appartenans a ladite ville »] ***** (a) Gaultier, tappissier, pour le louaige de la tour de rue Chievre (1), derriere la maison des hoirs feu Jehan Gallant l’aisné (2), l’allee de ladite ville entre deux, dont il payoit par chacun an vingt solz tournoys durant neuf ans qui sont finiz et passez. Laquelle tour ledit Gaultier a quictee et ne la tient plus. Pour ce cy           Néant

[fol. 47v, « Autre despence faicte pour cause de la nouvelle entrée du roy Loys XII^me de ce nom et de la royne cestedite annee en cestedite ville de Tours »] A Jehan Colas, tailleur d’ymaiges, la somme de douze livres, dix solz tournoys qui deue luy estoit pour avoir fait et taillé ung lyon de boys de noyer de la sorte de celuy qui est [fol. 48] enfermé a la tour Feu Hugon (1) ainsi qu’il luy a esté devisé et ordonné par maistre Macé Papillon pour servir a l’entree du roy nostredit seigneur (2), dont estoit bruyt qu’il devoit faire entree nouvelle en ladite ville de Tours cedit an, en ung chaffault et mystere qui doit estre fait et joué a ladite entree au carrefour devant la maison de monseigneur le general de Beaune (3) ou quel a esté joué entre autres choses Sanson le Fort qui deffist ung lyon avecques les mains (4). A quoy faire ledit tailleur a fourny de boys et rendu a ses despens prest a dorer et paindre par composicion et marché faict avecq luy par ledit maistre Macé Papillon, a ce commis de par ladite ville, a ladite somme de XII l., X s. tournoys que ledit receveur a payee audit Jehan Colas par mandement desdits maire, esleuz et commis sur ce donné le XVIII^me jour de novembre l’an de cedit compte (5). Cy rendu avecques la quictance dudit Jehan Colas. Pour ce cy           XII l., X s. t.

[fol. 51, « Autre despence faicte pour cause de la nouvelle entrée du roy Loys XII^me de ce nom et de la royne cestedite annee en cestedite ville de Tours] A Guillaume Havart, tappissier demourant audit Tours, la somme de six livres, dix solz tournoys de composicion faicte avecques luy le XII^me jour de decembre l’an de cedit compte pour avoir tendu et detendu le nombre de dix pieces de tappisserie de menue verdure au chaffault qui a esté fait a la porte de Nostre Dame de La Riche pour servir a l’entree a l’entree (a) du roy et de la royne par eulx faicte nouvellement en cestedite ville ou moys de novembre l’an de cedit compte (1). Et pour icelle tappisserie avoir habillee en plusieurs endroiz d’icelle ou elle avoit esté rompue et dessiree audit chaffault par les archiers et autres durant lesdites entrees qui furent faictes par deux divers jours audit moys. Laquelle tappisserie avoit esté prestee et baillee a ladite ville par Alixis Dargonges [Dargouges] es mains de Jehan Perrigault et maistre Jehan Caloet, commissaires a ladite porte et misteres d’icelle, qui l’avoient fait tendre par ledit Havart. Laquelle somme de VI l., X s. t. en ensuivant l’ordonnance et tauxacion faicte audit Havart par les commissaires de ladite ville ordonnez a veoir la despence desdits misteres, ledit receveur a payee audit Havart par mandement aussi des maire, esleuz et commis de ladite ville sur ce donné le XII^me jour de decembre l’an de cedit compte. Cy rendu avecques la quictance (a) [fol. 51v] dudit Guillaume Havart. Pour ce cy ladite somme de           VI l., X s. t.

[fol. 51v, « Autre despence faicte pour cause de la nouvelle entrée du roy Loys XII^me de ce nom et de la royne cestedite annee en cestedite ville de Tours] A Henry Mathieu, paintre demourant audit Tours, la somme de quarante trois livres tournoys qui deue luy estoit pour avoir fait par commandement de ladite ville aux misteres faiz et ordonnez de par icelle aux entrees du roy et de la royne les choses qui s’ensuivent (1) et a icelles fourny de toutes estoffes et journees de sondit mestier. Et la quelle somme luy a esté tauxee le XXIII^e jour de decembre l’an de cedit compte par les commissaires ordonnez de par ladite ville a veoir et tauxer les despences et mises faictes de par icelle ausdites entrees. C’est assavoir, pour avoir fait ung harnoys enlevé et moulé, doré d’or bruny et de fin argent que maistre Guillaume Garreau avoit sur luy. Item, avoir fait une targete nervee, enlevee et doree de fin or bruny et bon azur. Item, ung grant escusson aux armes de ladite ville a trois grans tours estouffé d’azur et de noir. Item, pour avoir reffaict d’azur les armes du roy par troys foiz. Avoir fait une cote d’armes sur taffetas bleu estouffee de fin or pour le roy. Avoir fait le moule de la serpent et de l’enfant et moulé dessus lesdits moules [fol. 52], ladite serpent d’azur et ledit enffant de beau rouge qui demonstroient estre les armes de Milan que le roy tenoit en ses mains sur les chaffaulx (2). Avoir fait deux moules de serpent pour Hercules et moulé sur lesdits moules de painture lesdits serpens et Hercules (3). Avoir fait ung cueur doré de fin or dehors et dedans fait d’azur a troys fleurs de lys dorees. Item, pour une lance rouge semee de tours d’estaing blanc servant a l’esleu Garreau. Avoir fait deux heaulmes dont l’un est couvert d’estaing blanc et l’autre jaulne et rouge pour servir audit Garreau. Avoir fait ung baston painct de vert pour le roy David (4) et deux gros boys en faczon de croix tous paincts de beau vert servans au jardin. Avoir fainct le lyon et fait le poil, la barbe et estouffe comme ung lyon (5). Avoir fait le moule de Golyas et moulé et estouffé dessus ledit moulle de painture ainsi qu’il appartient, et fait les cheveux et le chappeau, tous pains, et fait dedans la teste de Golyas, une faincte qui rendoit le sang (6). Avoir escriptz tous les dictez des chaffaulx qui estoient ou carroy de seigneur Jacques de Beaune (7), tant de Sanson (8), David, Golyas et Hercules pour le roy qui tenoit la serpent pour Ludovicus (9). Avoir fait trois grans rolletz servans audit chaffault. Avoir escript quatre autres [fol. 52v] rolletz, l’un pour Philistin, l’autre pour Judic (10), l’autre pour le grec (11) et l’autre pour Generaciones. Avoir collé lesdits escripteaux sur les ays desdits chaffaulx. Avoir escript pour Turnus et pour le duc Hugues six ou sept dictez (12). Avoir fait dix autres grans escripteaulx baillez par maistre Guillaume Sireau pour servir ou jardin ordonné. Avoir painct le chassis de beau bleu servant au pesle du roy (13). Item, a l’entree du roy pour avoir couvert l’escusson qui avoit servy au roy par la moictié de toille, fait ung champ d’azur semé d’armynes et fait une grant cordelliere tout alentour dudit escusson. Avoir painct de bleu servant au ciel de ladite dame. Avoir painct les quatre bastons servans a porter le ciel d’azur et argent par moictié. Sur la moictié desqueulx bastons et sur ledit azur a esté semé plusieurs fleurs de lys de fin or, et sur l’autre moictié fait d’argent semé plusieurs hermynes. A faire lesquelles choses dessusdites ledit Henry Mathieu a fourny tant de faczons, journees de paintres, estouffes et de toutes autres choses comme dessus est dit pour la somme de XLIII l. t. Laquelle luy a esté ordonnee et tauxee par lesdits commissaires ordonnez a veoir les mises et despences desdites entrees et par deliberacion de ladite ville faicte au moys de novembre (a) [fol. 53] l’an de cedit compte. Laquelle somme de XIII l. t. ledit receveur a payee audit Henry Mathieu par mandement desdits maire, esleuz et commis sur ce donné le XXIII^e jour de decembre l’an de cedit compte. Cy rendu avecques la quictance dudit Henry Mathieu, paintre dessusdit. Pour ce cy           XLIII l. t.

[fol. 55v, « Autre despence faicte pour cause de la nouvelle entrée du roy Loys XII^me de ce nom et de la royne cestedite annee en cestedite ville de Tours »] Aux personnes cy apres nommees la somme de [fol. 56] deux mil trois cens soixante unze livres, dix huit solz, quatre deniers tournoys qui deue leur estoit pour les causes qui s’ensuivent.

C’est assavoir, a Nycolas Pelle pour le nombre et quantité de cinq cens cinquante six escuz souleil, dix neuf solz, trois deniers tournoys par luy fourniz et baillez par commandement des maire, esleuz de ladite ville a Jehan Gallant, orfevre, pour employer a faire la couppe poisant avec le couvercle huit marcs d’or. Laquelle a esté donnee et presentee de par ladite ville au roy nostredit seigneur a sa nouvelle venue et entree en cestedite ville le mardi XXIIII^e jour du moys de novembre l’an de cedit compte. Ledit don fait en ensuivant les deliberacions de ladite ville faictes en l’ostel d’icelle a plusieurs et divers jours oudit moys, valent lesdits cinq cens cinquante six escuz d’or souleil a XXXVI s., III d. t. piece et XIX s., III d. monnoye           M VIII^c XIIII s., III d. t.

Item, a luy pour le nombre et quantité de IIII^c LXXV escuz d’or souleil, XXII s., X d. monnoye bons et de poix de XXXVI s., III d. t. piece monnoye, VIII^c LXII l., I s., VII d. t. par luy semblablement baillez et fourniz a Jehan Chapillon, orfevre, pour convertir et employer a faire et forger le nombre et quantité de LXI pieces d’or (a) [fol. 56v] grandes et larges dont les soixante ont esté mises dedans ladite couppe d’or et donnees et presentees audit seigneur. Et l’une et la plus legiere retenue et baillee audit receveur pour en rendre compte. Poisant lesdites LXI piece ensemble six marcs d’or. Ainsi qu’il est apparu par la certifficacion de maistre Nicolle Chartier et de Jehan Bodin presens a icelle veoir poiser, valent lesdits IIII^c LXXV escuz d’or souleil et XXII s., X d. monnoye, la somme de VIII^c LXII l., I s., VII d. tournoys. Pour ce cy ladite somme de           VIII^c LXII l., I s., VII d. t.

Plus a luy pour l’achapt par luy fait du nombre et quantité desdits escuz montans en nombre mil trente ung escu d’or souleil pour convertir a faire la tasse de ladite couppe d’or dessusdite et lesdites pieces d’or. Pour tout ce la somme de           XVI l., II s., VI d. t.

Item, audit Jehan Gallant, orfevre, pour la faczon de ladite couppe d’or par luy faicte selon le devis qui luy a esté baillé avecques le couvercle d’icelle. A quoy faire il a vacqué par plusieurs jours et ses gens jour et nuyt, pour ce que la chose fut hastee, luy a esté ordonné par deliberacion des gens de ladite ville faicte en l’ostel d’icelle le IX^me jour de decembre l’an de cedit compte pour ladite (b) [fol. 57] fasson de ladite couppe, la somme de vingt cinq escuz d’or couronne, valent la somme de           XLIII l., XV s. t.

Item, audit Jehan Chapillon, orfevre, pour avoir fait forgé et monnoyé ledit nombre de LXI piece d’or dessudictes faictes a la devise dudit seigneur, d’un cousté sa face et de l’autre cousté le porc espyc et les armes de ladite ville dessoubz, dont les LX pieces ont esté mises dedans ladite couppe d’or, donnees et presentees audit seigneur ainsi que dit est. Et l’autre baillee audit receveur. A quoy faire il a convenu faire le coing et trousseau expres et y vacquer jour et nuyt, pour la quelle chose luy a esté tauxé en ladite assemblee la somme de XXV l. t. Pour ce cy ladite somme de           XXV l. t.

A Remon Guionnet, marchant orfevre dudit Tours, pour la vendicion et livraison de la nef, tant d’or que d’argent doré, la somme de deux cens escuz d’or souleil. Laquelle semblablement a esté donnee et presentee de par ladite ville a la royne a sa nouvelle venue et entree en ladite ville de Tours par elle faicte deux jours apres celle du roy nostredit seigneur qui fut le XXVI^e jour de (c) [fol. 57v] novembre cedit an. En laquelle nef a esté employé pour la enrichir de pavoys et encres d’or, le nombre de vingt escuz souleil et dix escuz couronne en ensuivant les deliberacions des gens de ladite ville faictes en l’ostel d’icelle oudit moys de novembre, valent ladite nef, tant pour la fasson que pour lesdits enrichissemens, la somme de           IIII^c XVI l., V s. t.

Lesquelles parties cy dessus declairees et pour les causes que dessus font et montent ensemble ladite somme de II^m III^c LXXI l., XVIII s., IIII d. t. que ledit receveur a payee aux dessus nommez par mandement desdits maire, esleuz et commis sur ce donné le IX^me jour de janvier l’an de cedit compte (1). Cy rendu avecques la quictance desdits dessusnommez. Pour ce cy           II^m III^c LXXI l., XVIII s., IIII d. (d)

[fol. 57v, « Autre despence faicte pour cause de la nouvelle entrée du roy Loys XIIme de ce nom et de la royne cestedite annee en cestedite ville de Tours »] Aux personnes cy apres declairees la somme de quarante une livres, cinq solz tournois qui deues leur estoit. C’est assavoir, a Pierre Baudet, brodeur, pour la faczon du pesle fait pour l’entree de la royne (1) de satin blanc de Burges (a) et bleu par moytié. Et en iceluy avoir fait, mys et assis le nombre et quantité de cent et dix fleurs de lys taillees de drap d’or, et cent et dix hermynes taillees de veloux noir. Et pour avoir fait sept aulnes, [fol. 58] trois quars de frange de soyes de plusieurs couleurs mises et assises aux pantes dudit pesle dont la ville a fourny de toutes estouffes (2). Pour la fasson du quel pesle ledit brodeur demandoit dix escuz d’or pour ce qu’il luy avoit convenu veiller jour et nuyt et y mectre ouvriers d’avantaige pour la haste qui y estoit de ce faire. Laquelle faczon a esté tauxee par les commissaires ordonnez par ladite ville a six escuz. Pour ce           X l., X s. t. (b)

[fol. 59v, « Autre despence faicte pour cause de la nouvelle entrée du roy Loys XII^me de ce nom et de la royne cestedite annee en cestedite ville de Tours »] A Michel Colombe, tailleur d’ymaiges, la somme de cent cinq solz tournoys qui deue luy estoit. C’est assavoir, LXX s. t. pour avoir fait le mousle du harnoys de Turnus (1) de terre fort grasse pour bailler a maistre Guillaume Garreau, esleu de ladite ville, pour jouer le mistaire de Turnus a l’entree du roy et de la royne a la porte de Nostre Dame de la Riche (2) ainsi qu’il a esté devisé a l’anticque fasson. Et XXXV s. t. pour avoir fait ung patron baillé a Jehan Chappillon, orfevre, pour faire les pieces d’or ordonnees estre mises dedans la couppe d’or qui a esté donnee au roy nostredit seigneur a son entree en ladite ville de Tours (3). Ou quel patron estoit la face dudit seigneur d’un cousté, et de l’autre cousté le porc espyc, et dessoubz les armes de ladite ville, ainsi que ledit patron fut devisé (4). Lesquelles deux parties dessusdites font et montent ensemble ladite somme de cent cinq solz tournoys que ledit receveur a payee audit (a) [fol. 60] Michel Colombe par mandement desdits maire, esleuz et commis sur ce donné le XVIII^e jour de janvier l’an de cedit compte (5). Cy rendu avecques la quictance dudit Michel Colombe. Pour ce cy ladite somme de           C V s. t.

[fol. 60, « Autre despence faicte pour cause de la nouvelle entrée du roy Loys XII^me de ce nom et de la royne cestedite annee en cestedite ville de Tours »] Aux personnes cy apres nommees la somme de deux cens quarante huit livres, dix huit solz, cinq deniers tournoys qui deue leur estoit pour les parties de despences cy apres declairees qui ont esté faictes de par ladite ville pour le fait de l’entree du roy et de la royne ou moys de novembre l’an de cedit compte (1). (a)

[fol. 60v, l. 4] Item, a Blaise Meauze, Jehan Janvier, Robert de Montagu, Jacotin des Moulins, Pierre Braquemart, Estienne Armeurier, Estienne Angibault, Guillaume Janvier, Simon Aubergeonnier, Jehan Phelipes, Girard Petit et Jehan Rabarou, tous armeuriers, pour leur paines et sallaires d’avoir vacqué oudit chaffault de la Riche (2) ausdites entrees du roy et de la royne, tous armez a blanc de harnoys combles dont ils ont fourny pour jouer le mistaire de Turnus (3) que a joué maistre Guillaume Garreau et luy tenir compaignie. A quoy faire ilz ont vacqué par XX journees et fourny d’abillemens au pris de XII s., VI d. t. par jour. Ce que a esté certiffié par ledit Perriguault. Pour ce           XII l., X s. t.

A Georges Lemore, Jehan Lenfant, Marsault Perrotin et Jehan Katheline, armeuriers, pour semblablement avoir vacqué par chacun deux journees tous armez a blanc au chaffault et mistaires qui ont esté jouez ausdites entrees au chaffault fait au carrefour de monseigneur le general de Beaune (4) par l’ordonnance de maistre Macé Papillon, commissaire dudit chaffault, qui sont [fol. 61] huit journees audit pris de douze solz, six deniers tournoys par jour. Pour ce           C s. t.

(l. 11) Item, a Jehan de Troys, armeurier, pour avoir habillé le harnoys de son filz qui a joué avecques Turnus au chaffault de la Riche et pour sondit filz vingt cinq solz tournoys. Pour ce            XXV s. t.

[fol. 61v, l. 10] Item, a maistre Robert Queru, escripvain, pour avoir fait et escript en grosse lectre plusieurs escripteaux du nom de Loys dont en y avoit plusieurs en lectres d’or par l’ordonnance dudit maistre maistre (b) Robert Pertuys pour servir oudit chaffault a l’entree du roy, quarante solz tournoys. Pour ce            XL s. t.

[fol. 67v, « Despence commune »] A Gilles Desquartes receveur dessusdit la somme de soixante dix huit livres, sept deniers tournoys pour le rembourser de semblable somme par luy payee et baillee pour ladite ville par commandement des maire, esleuz et commis d’icelle es moys de novembre, decembre, janvier, fevrier et mars l’an de cedit compte, aux personnes et pour les causes qui s’ensuivent.

[fol. 72, l. 1] Item, a Jehan Riveron, escripvain, pour avoir escript et reffait au net le tableau des pers et conseillers de ladite ville et y avoir mys les nouveaulx ou lieu de ce qui estoient decedez, et fait la premiere lectre dudit tableau d’or mouslé, pour le mectre en l’ostel de ladite ville. Pour ce cy la somme de           XXV s. t.