[fol. 70v, « Despence commune » ] A Jehan Porchier, orfeuvre, et Martin Morice, brodeur, la somme de treze livres, huit solz, neuf deniers tournois que deue leur estoit. C’est assavoir : 

Audit Jehan Porchier, orfeuvre, VII l., X s. t. pour cinq onces d’argent mises en orfaverie au pris de XXX s. t. chacune oncee lesquelles ont esté assises par ledit Morice sur cinq manches des robes des cinq clercs de ladite ville l’annee de cedit compte. Pour ce             VII l., X s. t.

Item, audit Morice, brodeur, C XVIII s., IX d. t. pour avoir assis ladite orfaverie d’argent, fourny de fil d’argent et de soye a broder les cinq manches des robes desdits cinq clercs, et en icelles manches avoir en levé en broderie les armes de ladite ville en chacune manche, au pris de XXIII s., IX d. t. chacune manche, par marché fait avecques ledit Morice. Pour ce           C XVIII s., IX d. t.

Lesquelles deux parties font et montent ensemble ladite somme de XIII l., VIII s., IX d. t. que ledit receveur a payee audit Jehan Porchier par mandement desdits maire, esleuz et commis sur ce donné le XIII^e jour de janvier M CCCC LXXVII (1). Cy rendu avecques la quictance dudit Porchier. Pour cecy             XIII l., VIII s., IX d. t.

[fol. 73, « Despence commune »] Item, a Alart [Folarton ?], paintre, la somme de L s. t. pour avoir paint en deux estatures le prince d’Orange par le commandement du roy nostredit seigneur qui ont esté mises aux portes de La Riche et du pont. Pour ce             L s. t.

[fol. 89, « Despence commune »] A Alart Folarton, paintre, la somme de quarente quatre livres tournois qui deue lui estoit pour ses paine et sallaire d’avoir painct et fourny de toutes estoffes de sondit mestier le portal de l’entree de l’ostel de ladite ville avecques cinq escussons. C’est assavoir, l’un en la cheminee dudit portal, deux autres soubz les clefz (a) [fol. 89v] de la voulte et les autres deux sur les deux huys du grant corps d’ostel. Et aussi paint ung lyon de pierre avecques les armes de ladite ville, lequel lyon est assis sur le bort de la grant eschelle de l’ostel de ladite ville. Et aussi avoir paint cinq bannieres des armes du roy, de la royne et de monseigneur le dauphin et de ladite ville, icelles bannieres mises sur les pinacles tant dudit portal, la couverture de ladite grant eschelle, que sur la maison neufve du darriere. Et aussi pour avoir paint de couleurs les espiz ou ont esté mises lesdites bannieres. Laquelle somme de XLIIII l. t. ledit receveur a payee audit Alardin par mandement desdits maire, esleuz et commis sur ce donné ledit dernier jour d’octobre M CCCC LXXVIII cy rendu avecques la quictance dudit Alardon. Pour cecy           XLIIII l. t.

[fol. 94r] En la presence de nous Jehan Follet, Phelipot Cordon et Estienne Anglement, grans marchans d’Angers et de Tours, a presant demerans en ceste ville de Franchise [Arras], esleuz et commis par noble homme Estienne Benard dit Moreau, seigneur d’Escuillé, conseiller et maistre d’ostel du roy nostre seigneur, et maistre Guillaume de Feriray, aussi conseiller dudit seigneur, greffier de sa court de parlement et maire d’Angers, commissaires de par icelluy seigneur a recevoir les mesnaigers des villes envoyez en cestedite ville pour la popullacion d’icelle. A estre presans, veoir, bailler legs, deniers et passer les quictances des sommes de deniers que recevront lesdits mesnaigers de la despence qu’ilz ont faicte depuis leur partement de la ville de Tours jusques au XV^e jour d’aoust, et aussi d’un moys commancent ledit XV^e jour dudit moys d’a[oust]. Laquelle despence et moys leur a este paiee et baillee par Jehan Bertran et Jehan Debray, commis par ladite ville de Tours a amenez lesdits mesnaigers en cestedite ville. Desquelz mesnagers les nons et seurnons s’ensuyvent, et les sommes de deniers qui a ung chacun d’eulx particullierement ont esté paiees et baillees en noz presences.

Premierement :

[fol. 94v, l. 7] Denis des Bournays , armusier, pour semblable despence           VIII l., VII s., III d.

Pour son varlet           XX s.

Pour son moys           IIII l.

Somme, XIII l., VII s., III d.

Plus a receu des armusiers de Tours           IIII^xx l., IIII s., II d.

(l. 12) A Claude Duval, brigandinier, pour semblable despence           VIII l., VII s., III d.

Pour la despence de son filz           XXXVI s., VIII d.

Pour son moys et son filz           C s.

Somme           XV l., III s., X d.

Plus a receu des brigandiniers de Tours           XL l.

(l. 28) Jehan Lebarbier, offevre, pour semblable despence           VIII l., VII s., III d.

Sa femme en despence           XXV s., VIII d.

Son varlet           XX s.

Son moys de luy et sa femme           C s.

Somme           XV l., XII s., XI d.

Plus a receu des offevres de Tours           IIII^xx XII l.

[fol. 96, l. 1] Loys Ranon (ou Ravon), esperonnier, pour sa despence            C XII s., IX d.

Son moys           IIII l.

Son varlet           XX s.

Somme           X l., XII s., IX d.

Plus que la ville luy a donne et le mestier           XL l.

[fol. 97, l. 26] Guillaume <Jehan> (a) Robaro, brigandinier, sa despence en ceste ville           C XII s., IX d.

Le moys            IIII l.

Somme            VI l., XVII s. IX d.

Plus que luy fault envoyer            XL l.

[fol. 97v, l. 10] Lesquelles parties montent ensemble la somme de cinq cens soixante seize livres, troys solz, troys deniers tournoys, en ce non comprins les dons faiz par les gens de mestiers. De laquelle somme de V^c LXXVI l., III s., III d. t. les dessus nommez et ung chacun d’eulx se sont tenuz pour contans et bien payez, et en ont quicté et quictent lesdits commissaires et tous autres a qui quictance en doit appartenir. En tesmoins de ce, nous avons cy mis noz seings manuelz le XVII^e jour d’aoust l’an mil CCCC soixante dix neuf.

Signé CORDON, FOLLET et ANGLEMENT.

Et les parties que les gens de mestiers de la ville de Tours ont baillé et donné ausdits mesnaigiers se montent ensemble la somme de quatorze cens cinquante troys livres tournois. Pour ce           XIIII^c LIII l. t.

[fol. 176, « Despence commune »] A Philemon Hemon, plombeur, la somme de trente quatre livres, ung sole, neuf deniers tournois qui deue lui estoit pour avoir fait cestedite annee les parties d’ouvraiges cy apres declairees, et fourny de toutes choses comme de plomb, estaing, or pour dorer de coulleurs et de sa faccon, renduz tous prestz et assis en l’ostel de ladite ville quatre espiz, l’un sur le pinacle de la maison faicte de neuf du cousté de devers la Monnoye, et les autres troys sur les pinacles de la couverture de l’eschelle a entrer en la salle de l’ostel deladite ville, avecques troys gargoulles a gecter et a gouter les eaues desdites troys goutieres de dessus ladite eschelle. En quoy pour ce faire est entré VII^c IX livres de plomb, au pris de LX s. t. le cent vallent           XXI l., V s. t.

Item, pour XVI livres d’estaing a soulder et estamer ledit plomb, a II s., I d. t. la livre vallent           XXXIII s., IIII d. t.

Item, pour II^c III quarterons, feulles d’or, party employees a dorer le fueillage desdits espiz et gargoulles, a X s. t. le cent vallent           XVI s. t.

Item, pour demy cent de fueilles d’or fin a dorer la courronne qui est en l’un desdits espiz desdits quatre pinacles           XVI s. t.

Item, pour la fasson et fourny de toutes autres coulleurs la somme de           IX l. t.

Lesquelles parties dessusdites font et montent ensemble ladite somme de XXXIIII l., I s., IX d. t. que ledit receveur a payee audit Philemon Hemon par mandement desdits maires, esleuz et commis sur ce. Donné le XIIII^e jour (a) [fol. 176v] de fevrier M CCCCLXXVIII, cy rendu avecques la quictance dudit Hemon. Pour cecy           XXXIIII l., I s., IX d. t.

[fol. 176v, « Despence commune »] A Gallet Jourdain, victrier, la somme de vingt troys livres tournois qui deue lui estoit pour avoir fait de son mestier, rendu et livré a ladite ville l’annee de cedit compte cent piez de verre blanc, et iceulx assis en deux des croysees de la salle de l’ostel de ladite ville, et deux grans fennestres dormans a verre qui sont en ladite salle, l’une devers la grant rue et l’autre devers la court, et deux croisees en la chambre de dessus le portal, l’une a avoir le jour de devers ladite grant rue et l’autre devers ladite court, une autre croisee en la chambre et maison faicte de neuf devers la Monnoye, au pris de III s., IX d. t. payé de verre vallent           XVIII l., XV. s. t.

Item, pour avoir fait esdites victres XI escussons d’armoirye garniz de rondeaux et de chappeaulx, au pris de VII s., VI d. t. chacun rondeau et chappeau vallent la somme de           IIII l., II s., I d. t.

Item, pour avoir abillé et reparé la verriere qui de piecca estoit en l’une des croysees de ladite salle           II s., VI d. t.

Lesquelles parties dessusdites font et montent ensemble ladite somme de XXIII l. t. que ledit receveur a payee audit Gallet Jourdain par mandement desdits maire, esleuz et commis sur ce. Donné le XVII^e jour de fevrier M CCCCLXXVIII, cy rendu avecques la quictance dudit Gallet. Pour cecy          XXIII l. t. (a)

[fol. 183, « despence commune »] A Allart Folarton, paintre, la somme de soixante [fol. 183v] quatre livres, troys solz, quatre deniers tournois pour XL escuz d’or qui deue lui estoit pour avoir fait et paint de son mestier et fourny de toutes coulleurs, asur, bateure et autres choses a ce nescessaires en l’ostel de ladite ville, l’annee de cedit compte. C’est assavoir.

Pour avoir fait contre la cheminee de la salle de ladite maison une annunciacion de Notre Dame, et ladite cheminee couverte d’azur semee de fleurs de lys de bateure, et le bas de ladite cheminee fait en couleur de jaspre, dont il a eu pour ce faire dix escuz d’or vallent a monnoye          XVI l., X d. t. (a)

Item, pour avoir paint de roge, blanc et vert tout le hault du chambrillys de ladite salle et tout le tour avecques quatre tirans, et quatre pilliers tirans contremont le chambrillys de ladite salle, et quatre grans escuz d’armoysie qui sont ou hault des pinacles, et quatre angelotz qui portent quatre escussons soubz les tirans qui sont au travers de ladite salle. Et a eu tant pour soy chaffaulder que pour fournir de tout X escuz vallent           XVI l., X d. t.

Item, pour avoir paint tout le tour des murs de ladite salle, en quoy il a fait par les bas une terrace a creneaux semee d’erbages, et XXIIII grans arbres rempliz de fasson d’arbres a fruit et d’oyseaux, et a ung chacun desdits arbres ung escu aux armes de ladite ville, le chef d’azur a fleurs de lys de bateure et le champ de sable a tours de bateure d’argent, avecques XVII escuz aux armes des maires qui ont esté jusques a cestedite annee, faiz de bateure et riches coulleurs chacun ainsi qu’il appartient, estachez [fol. 184] tous lesdits escuz aux arbres dessusdits a grains sainteres de couleur et escripteaux aux dessoubz, en quoy sont les noms d’un chacun desdits maires. Et a eu pour ce faire et fournir de toutes choses XIIII escuz vallent           XXII l., IX s., II d. t.

Item, pour avoir paint troys escussons des armes du roy, de la royne et monseigneur le daulphin qui sont ou hault du pinacle de ladite salle, avecques deux autres escussons dudit seigneur et dame, et les armes de ladite ville qui sont ou front de la gallerie ainsi que l’on monte en la grant eschelle, avecques ung angelot tenant les armes de la royne qui est ou hault du pinacle de la maison neuve faicte au bout de la court. Et a eu pour ce faire deux escuz d’or vallent           LXIII s., II d. t.

Item, pour avoir paint tout le tour de l’auditoire ou se tient le tablier de ladite ville en couleur de sable semé de tourelles, et le chef de bleu semé de fleurs de lys, et le davant en coulleur de jaspre, et a l’entree ung gros villain pour faire monstre tenant les armes de la ville en ung estot. Et a eu pour ce faire et fourny de toutes choses quatre escuz d’or vallent            VI l., VIII s., IIII d. t.

Lesquelles parties dessusdites font et montent ensemble ladite somme de LXIIII l., III s., IIII d. t. que ledit receveur a payee audit Folarton par mandement desdits maire, esleuz et commis sur ce donné le dernier jour d’octobre M CCCCLXXIX (1). Cy rendu avecques la quictance dudit Folarton. Lesquelles choses dessusdites ont esté faictes depuis le premier jour de septembre l’an de cedit compte et pour le parement et honnesté de ladite ville. Pour cecy           LXIIII L., III s., IIII d. t.