[fol. 88, « Despence commue »] A Nycolas Phelipes, brodeur, la somme de cent dix huit solz, neuf deniers tournois qui deue lui estoit pour avoir assis ceste presente annee en broderie sur les cinq manches des robes des cinq clercs de ladite ville cinq onces d’argent en orfaverie aux armes de ladite ville, fourny de fil d’argent et de soye a broder lesdites cinq manches desdites robes, au pris de XXIII s., IX d. t. chacune manche, vallent ladite somme de C XVIII s., IX d. t. (1) Laquelle somme ledit receveur a paiee audit Nycolas Phelipes par mandement desdits maire, esleuz et commis. Sur ce donné le XXVIII^e jour de janvier l’an de cedit compte (2). Cy rendu avecques la quictance dudit Nycolas Phelipes. Pour cecy           C XVIII s., IX d. t. (a)

[fol. 88, « Despence commune »] A Jehan Porchier, orfeuvre, la somme de sept livres, dix sept solz, six deniers tournois qui deue lui estoit pour cinq onces d’argent ouvrees en orfaverie, quatre blanches au pris de XXX s. t. l’once et une doree a XXXVII s., VI d. t. l’once, qui assises et employees ont esté sur les cinq manches des robes desdits cinq clercs de ladite ville (1) l’annee de cedit present compte, qui font ensemble ladite somme de VII l., XVII s., VI d. t. Laquelle somme ledit receveur a paiee audit Jehan Porchier par mandement desdits maire, esleuz et commis. Sur ce donné le XII^e jour de fevrier l’an de cedit compte (2). Cy rendu avecques la quictance dudit Porchier. Pour cecy            VII l., XVII s., VI d. t. (a)