[fol. 12] Ledit Galocheau  se charge aussi cy-dessus en recepte ou neufiesme article d’icelle recepte soubz le nom des collecteurs de la paroisse de Saint-Saturnin de la somme de huit cens livres tournois pour leur [fol. 12v] cocte de ladicte somme de trois mil escuz pour ledit prest de laquelle somme il n’a receu desdiz collecteurs et autres particuliers de ladicte parroisse que la somme de cinq cens deux livres, six solz et huit deniers tournois. Et le reste qui monte II^c IIII^xx XVII l., XIII s., IIII d. t. ilz n’ont peu recouvrer des particuliers cy apres nommez qui le doivent par les parties qui s’ensuivent, lesquelles montent plus de la somme de ***** que lesdiz collecteurs avoient couchee avecques lesdites VIII^c livres pour paier les fraiz que ne monte ledit reste ainsi qui s’ensuit. C’est assavoir :

(l. 28) Jehan Gonnebault, orfevre [doit]             XV s.

(l. 30) Guichart, brodeur [doit]           V s.

[fol. 13, l. 4] Estienne Boutet, tapicier de la royne [doit]           XXVII s. VI d.

(l. 7) Jehan Benoist, tapicier [doit]           X s.

[fol. 13v, l. 29] L’oste Gacian Rogier, brigandinier [doit]            LX s.

(l. 30) Jehan Damon [Damou], artilleur [doit]           XXVII s., VI d.

[fol. 14] Et par ce reprant cy par ses mains ledit Galocheau ladicte somme de II^c IIII^xx XVII l., XIII s., IIII d. t. Et la remect et laisse a ladicte ville en deniers renduz et non receuz avecques les gaiges des executez qui sont en l’ostel de ladicte ville, pour la recouvrer selon lui semble desditz particuliers. Pour cecy           II^c IIII^xx XVII l., XIII s., IIII d. t.

[fol. 94, « Despense commune »] A Jehan Belin, brodeur, la somme de six livres tournois qui deue lui estoit pour orfavrerie, filz d’argent et de soye, qu’il avoit quis (a) et livrez et iceulx employez a broder quatre des manches des robes des quatre clercs de ladite ville qui leur avoient esté donnees en l’an de cedit compte de par ladite ville et en icelles manches avoir enlevé en broderie les armes de ladicte ville, au pris de trente solz tournois pour chacune manche (1). Laquelle somme de [fol. 94v] six livres ledit receveur a paiee audit Jehan Belin par mandement desdiz maire et commis sur ce donné le XXII^e jour de janvier l’an mil quatre cens soixante et dix (2). Cy rendu avecques la quictance d’icellui Jehan Belin. Pour cecy             VI l. t. (b)

[fol. 94v, « Despense commune »] ] A Tassin Vinet, victrier, la somme de dix livres et quinze solz tournois qui deue lui estoit pour cinquante six piez de victres qu’il avoit faictes livrees et icelles rendues assises le XXVI^e jour de janvier l’an de cedit compte es quatre haultes fenestres de la salle de l’ostel de ladicte ville, et en icelle fait quatre escussons, esquelz il avoit fait les armes du roy, de la royne et celles de la ville, et autour d’iceulx, quatre chappeaux semez de fleurs au pris de trois solz, neuf deniers tournois chacun pié desdictes victres, moyennant lesdicts quatre escussons et chappeaux dessusdiz qui vallent audit pris dix livres, dix solz tournois, et cinq solz pour le vin du marché fait avecques lui desdictes victres. Laquelle somme de dix livres, quinze solz tournois ledit receveur lui a payee par mandement desdiz maire et commis sur ce donné ledit vingt septiesme jour de janvier l’an mil quatre cens soixante et dix (1). Cy rendu avecques la quictance d’icellui Tassin Vinet. Pour cecy           X l., XV s. t. (a)

[fol. 98v, « Despense commune »] A maistre Francisque de la Chevallerie, natif du pais de Napples, ouvrier de tentes et pavillons pour fait de guerre, la somme de vingt livres tournois a laquelle lesdiz maire et commis f[ui]erent a lui en ensuivant la deliberacion des gens de ladicte ville, faicte en l’ostel d’icelle le septiesme jour d’aoust l’an de cedit compte (1), sur les lectres closes du roy nostre sire par lesquelles il mandoit aux maire et eschevins d’icelle ville qu’il avoit fait venir ledit maistre Francisque dudit pais de Napples et qu’il le feissent loger en ladicte ville et des deniers communs delivrer aucune somme pour vivre et se entretenir pour ung an. Et que en ce faisant ladicte ville lui feroit plaisir et service agreable, et le recongnoistroit envers eulx si d’aucune chose ladicte ville le vouloit requerir. Laquelle somme de XX l. t. ledit receveur a paiee audit maistre Francisque par mandement desditz maire et commis sur ce donné le derrenier jour d’aoust l’an mil quatre cens soixante et unze. Cy rendu avecques la quictance d’icellui maistre Francisque. Pour cecy             XX l. t (a).

[fol. 101,« Despense commune »] A Jehan Thevenin, contrerolleur du grenier a sel de ladite ville, la somme de quinze livres tournois qui deue lui estoit pour ung grant tappiz velu de Turquie qu’il avoit vendu et livré a ladite ville ou mois d’octobre l’an de cedit compte (1) pour faire parement et couvrir le tablier de ladite ville aux assemblees des gens d’icelle ville. Laquelle somme de XV l. t. ledit receveur a paiee audit Jehan Thevenin par mandement sur ce donné desdits maire et commis le dernier jour dudit mois d’octobre l’an mil IIII^c LXXI. Cy rendu avecques la quictance d’icelluy Jehan Thevenin, Pour cecy           XV l. t. (a)

[fol. 101, « Despense commune »] Audit receveur la somme de vingt deux livres, quatre solz et trois deniers tournois pour semblable somme que lesditz maire et commis lui avoient fait paier pour ladicte ville depuis le dernier jour d’avril jusques a la fin de l’an de cedit compte (1) aux personnes, pour les causes et par les parties qui s’ensuivent.

[fol. 101v, l. 4] A Jehan Haranc, orfevre, pour avoir gravé les armes de la ville en deux poinsons de fer pour marquer les harnois et brigandines vendues en ladite ville.            XXX s. (a)

[fol. 211, « Despense commune »] A Jehan Belin, brodeur, la somme de neuf livres tournoys qui deue lui estoit pour filz de soye et d’argent, et troys onces d’orfaverie qu’il a le tout livré a ladicte ville, et iceulx emploiez a enlever et faire la livree de ladicte ville en quatre des manches des robes donnees l’annee de cedit compte, par ladicte ville, aux quatre clercs d’icelle ville (1). Laquelle somme de IX l. t. ledit receveur a payee audit Jehan Belin par mandement desdits maire, esleuz et commis sur ce donné le XXVIII^e jour de decembre mil CCCC LXXI. Cy rendu avecques la quictance dudit Jehan Belin. Pour cecy           IX l. t. (a)

[fol. 212v, « Depense commune »] A Jehan Belotin, la somme de quatre livres, deux solz, six deniers tournoys qui deue lui estoit pour avoir paint d’azur et d’or l’escu du roy nostre seigneur, enlevé en pierre, au portail appellé le portail Billant (a) es faulxbourgs de la tour Feu Hugon (1), qui nagueres a esté abatu et refait par ce qu’il tomboit. Laquelle (b) [fol. 213] somme de IIII l., II s., VI d. t. ledit receveur a payee audit Jehan Belotin par mandement desdits maire, esleuz et commis sur ce donné le XXVI^e jour de fevrier M CCCC LXXI (2). Cy rendu avecques la quictance dudit Jehan Belotin. Pour cecy           IIII l., II s., VI d. t. (c)

[fol. 215v, « Despense commune »] Audit receveur la somme de cent soixante et douze livres, LIII solz, ung denier tournoys pour semblable somme que par lesdits maire et esleuz il a payee, baillee, delivree du sien par les parties, pour les causes et aux personnes ainsi qui s’enssuit.

(l. 29) Item, a Jehan Delaunay, paintre, le XVI^e jour de decembre l’an de cedit compte (1) pour avoir trassé et tiré par deux foiz en parchemin le boulevart de Saint-Estienne (2)           XXVII s., VI d. t. (a)